Navigation

Sprachnavigation Alt+1 Servicenavigation Alt+2 Bereichsnavigation Alt+3 Inhalt Alt+4 Suchen Alt+5

Bereichsnavigation

Portrait da Schluein

  • -(neues Fenster öffnet Foto in Originalgrösse)
  • -(neues Fenster öffnet Foto in Originalgrösse)

Il vitg da Schluein schai el vonn alla costa seniastra dalla Foppa, en ina posiziun climatica ordvart favoreivla. Tier il clima favoreivel vegn aunc la buna situaziun da traffic denter Glion e Laax/Flem. La capitala dil Grischun Cuera contonsch’ins cugl auto en ca. 30 minutas. Il territori communal cun ina surfatscha da 478 ha s’extenda dil Rein tochen si en la Val da Schluein/Val da Cafegns e cumpeglia ultra dil vitg sez las scheinas da Casanova, Caglia Liunga ed igl areal d’industria ad Isla. Il vitg vegl da Schluein schai sin 758 m.s.m. La differenza denter il pli bass punct al pli ault digl intschess communal munta rodund 640 m. Politicamein appartegn Schluein al cumin dalla Foppa ed al district dalla Surselva. La gronda part dils rodund 563 habitonts ein catolics e discuoran romontsch.

 

Igl uoppen da Schluein ha in funs blau-mellen (aur) e muossa da vart seniastra ina clav melna sil funs blau e da vart dretga ina spada blaua sil funs mellen. Quei ein ils simbols dils patruns baselgia dalla baselgia baroca da Schluein, ch’ei vegnida dedicada igl onn 1716 a s. Pieder (clav dil parvis) ed a s. Paul (la spada cun la quala el ei vegnius scavazzaus). Las colurs ein quellas dils signurs da Löwenberg.

 

La baselgia da Schluein en stil baroc ei in bein cultural da muntada naziunala. Ella ei vegnida construida igl onn 1643. Dapi 1716 eis ella dedicada als Sogns Pieder e Paul. La renovaziun ch’ei stada necessaria ei ida a fin igl onn 1981 ed ella vala per bein gartegiada.

 

 

Infrastructura

 

La casa da scola veglia ch'ei vegnida renovada 1990, ha oz la funcziun da casa communala. Leu sesanfla la canzlia communala, la sala, la stanza da sedutas sco era il biro da baghegiar.

 

La Vischnaunca da Schluein ha, entschiet en els onns siatonta/otgonta, saviu baghegiar ora sia infrastructura considerablamein:

Vias da quartier ell'entira vischnaunca, casa communala, engrondaziun dalla casa da scola, luvratori communal, provediment d'aua e canalisaziun, rempars ella Val da Schluein, illuminaziun publica, passapeis, parcadis, deposits da rumien e.a.v. Els onns navonta ha la vischnaunca giu scaffiu spazi da habitar enten vender entginas parcellas da baghegiar ad indigens.